የሐረሪ ሕዝብ ክልላዊ መንግሥት ገንዘብና ኢኮኖሚ ትብብር ቢሮ የመንግሥትን ውስን ሀብት በላቀ ብቃትና ተጠያቂነት ለማስተዳደር የሚያስችል የአቅም ግንባታና የግንዛቤ ማስጨበጫ ሥልጠና ሰጠ። ሥልጠናው ትኩረቱን ያደረገው በፕሮግራም በጀት ዝግጅትና አስተዳደር ላይ ሲሆን የክልሉ የበጀት፣ የዕቅድና ፕሮግራም እንዲሁም የፋይናንስ ዘርፍ ኃላፊዎች ተሳትፈውበታል።
የሥልጠና መድረኩን በንግግር ያስጀመሩት የቢሮው ኃላፊ ክቡር አቶ ሀምዲ ሰለሀዲን የፕሮግራም በጀት ሥርዓት ለክልሉ የልማት ግቦች ስኬት ያለውን ወሳኝ ሚና አብራርተዋል። በጀትን ማዘጋጀት የቁጥር ስሌትና የወጪ ዝርዝር ብቻ ሳይሆን ውስን የሆነውን የመንግሥት ሀብት ከሚጠበቁ የልማት ውጤቶች ጋር በጥበብ የማስተሳሰር ወሳኝ ተግባር መሆኑን ቢሮ ኃላፊው ገልጸዋል።
አክለውም የተመደበው ሀብት ለታለመለት ዓላማ መዋሉን በቅርበት መከታተልና የበጀት አጠቃቀሙን ግልጽነትና ተጠያቂነት በሰፈነበት መንገድ መምራት የሁላችንም ቁልፍ ኃላፊነት ነው ሲሉ ለመድረኩ ተሳታፊዎች ጥብቅ መልእክት አስተላልፈዋል።
በሥልጠና ቆይታው የፕሮግራም በጀት አዘገጃጀት ሒደት የመደበኛና የካፒታል ወጪዎችን በአንድ የተቀናጀ ዕቅድ ውስጥ የማካተት ስልቶች፣ እንዲሁም የበጀት አፈጻጸም ክትትልና ግምገማ ሥርዓቶች በዝርዝር ቀርበው ሰፊ ውይይት ተደርጎባቸዋል። ከዚህም ባለፈ ሀብትን በብቃት መጠቀምና በተቋማት ውስጥ ተጠያቂነትን ማጠናከር በሚቻልባቸው አሠራሮች ዙሪያ ግንዛቤ ተፈጥሯል።
የፕሮግራም በጀት አሠራር ዋነኛ ጠቀሜታ በጀትን ከተለምዷዊ አሠራር አውጥቶ ወደ ውጤት ተኮር ሥርዓት ማሸጋገሩ ነው። ይህ አሠራር ተቋማት የተመደበላቸው ሀብት ምን ተጨባጭ የልማት ውጤት እንደሚያመጣ በግልጽ እንዲለዩ ያስችላል። በዚህም የመንግሥት የልማት ዕቅዶችን አፈጻጸም በማፋጠንና ለሕዝቡ የሚደርሰውን የልማት ተጠቃሚነት የላቀ በማድረግ ረገድ ከፍተኛ አስተዋጽኦ አለው።
በመጨረሻም ከሥልጠናው የሚገኘውን ዕውቀት ወደ ተግባር በመተርጎም፣ የበጀት አፈጻጸምን ማሻሻልና ለሕዝብ የሚታይ የልማት ውጤት ማስገኘት እንደሚገባ ተጠቁሟል።









